पुणे- पुणे महापालिकेत शिवसेना कार्यकर्त्यांकडून झालेल्या धक्काबुक्कीनंतर किरीट सोमय्या ज्या पायरीवर पडले त्याच पायरीवर आज भाजप कार्यकर्त्यांनी सोमय्या यांचा सत्कार केला. यावेळी पुणे महापालिका कार्यालयाबाहेर भाजपकडून शक्तिप्रदर्शन करण्यात आले.
या सत्काराला पालिका प्रशासनाने परवानगी नाकारली होती. त्याचप्रमाणे महापालिका परिसरात मोठा बंदोबस्त तैनात करण्यात आला होता. शेकडो कार्यकर्ते किरीट सोमय्या यांच्या स्वागतासाठी आले होते. यावेळी गर्दीला नियंत्रण करताना पोलिसांची चांगलीच धावपळ झाली. यावेळी मोठा गोंधळ झाला. किरीट सोमय्या यांचे महापालिका आवारात आगमन होताच भाजप कार्यकर्त्यांनी जोरदार घोषणाबाजी सुरु केली. यावेळी भाजप शहराध्यक्ष जगदीश मुळीक, सभागृह नेते गणेश बिडकर आदी उपस्थित होते. किरीट सोमय्या यांना महापालिकेच्या पायऱ्यांवर आणल्यानंतर या ठिकाणी त्यांचा सत्कार करण्यात आला. आता शिवसेना नेमकी कुठे? असा प्रश्न भाजप कार्यकर्त्यांकडून विचारण्यात आला.
किरीट सोमय्या म्हणाले, ” पोलीस आयुक्त अमिताभ गुप्ता यांच्यावर कारवाई होणारच आज जो पोलीस बंदोबस्त होता, त्यादिवशी मात्र सर्व पळून गेले होते. उद्धव ठाकरे आणि संजय राऊत यांना हिशोब द्यावा लागेल. उद्धव ठाकरेंनी मला मारण्यासाठी 100 गुंड पाठवले होते. पोलीस आयुक्त अमिताभ गुप्ता यांच्यावर कारवाई होणारच. पवार आणि ठाकरे यांनी पैसे खाल्लेत. संजय राऊतांनी जे पैसे खर्च केलेत त्याचा हिशोब तर द्यावा लागेल, त्यांचा आणि पाटकर यांचा संबध काय ते त्यांनी जाहीर करावं. उद्धव ठाकरे यांनी पुणेकरांच्या जीवाशी खेळ केला आहे. बेनामी कंपनी ही संजय राऊतांची कंपनी आहे. त्या कंपनीला शंभर कोटींचं कॉन्ट्रॅक्ट देऊन फसवणूक केली आहे ” असा आरोप त्यांनी केला. किरीट सोमय्या यांच्या खांद्याला खांदा लावून भाजप उभे आहे, असे यावेळी जगदीश मुळीक यांनी सांगितलं.
दरम्यान, किरीट सोमय्या यांच्या पुणे महापालिकेच्या पाऱ्यांवरील सत्काराच्या कार्यक्रमावर काँग्रेस आणि शिवसेनेने आक्षेप घेतला होता. या सत्कार कार्यक्रमाला परवानगी देऊन नये असे निवेदन पालिका आयुक्तांना देण्यात आले होते. त्यामुळे सत्काराचा कार्यक्रम हा भाजप कार्यालयात करण्याचं ठरलं. पण पुणे महापालिका कार्यालय परिसरात शेकडो कार्यकर्ते किरीट सोमय्या यांच्या स्वागतासाठी आले होते. त्यामुळे सोमय्या यांचा सत्कार त्याच पायरीवर करण्याचा निर्धार भाजप कार्यकर्त्यांनी केला. एकूणच भाजपने करून दाखवले अशी प्रतिक्रिया व्यक्त केली जात आहे.
